Դեղատուն խոհանոցում

Հնում դեղորայք չի եղել, և մարդիկ հիվանդությունները դարմանել են բնական միջոցներով: Այսօր  ամեն ինչ ավելի դյուրին է դարձել. ցանկացած պահի կարելի է  մտնել դեղատուն ու այս կամ այն դեղը գնել կամ պատվիրել: Սակայն  շատերը դեղորայքային ալերգիա ունեն կամ էլ ուղղակի դեղորայք ընդունելուց խուսափում են:

Դրա համար չպետք է մոռանալ հինը, բնականը, ինչը բարերար ազդեցություն է թողնում` առանց կողմնակի երևույթների:  Չմոռանանք, որ շատ մթերքներ օժտված են բուժիչ հատկություններով ու դրանք ճիշտ օգտագործելու համար հարկավոր է  իմանալ, թե ինչ հատկություններով են օժտված:  Ահա  դրանցից մի քանիսը, որոնք,  սննդանյութ լինելուց բացի, կարող են նաև բուժիչ ազդեցություն ունենալ:

Կարտոֆիլը պարունակում է մեծ քանակությամբ օսլա, զանազան օրգանական թթուներ ու որոշ վիտամիններ: Ոչ ավանդական բժշկության մեջ այն լայնորեն է կիրառվում: Կարտոֆիլի օգնությամբ կարելի է բուժել աղեստամոքսային տրակտի հիվանդությունները: Խաշած կարտոֆիլը թեթևակի թուլացնող ազդեցություն ունի: Հում կարտոֆիլի հյութը խմում են աղիքների աշխատանքի կանոնավորման, սրտխառնուքի  ու փսխման դեպքում: Այն կարգավորում է ստամոքսի թթվայնությունը: Խաշած կարտոֆիլը հզոր միջոց է վերին շնչուղիների հիվանդությունների դեպքում: Եթե մրսած եք,  անհրաժեշտ է կեղևով խաշած կարտոֆիլի  գոլորշիով ինհալյացիա անել  կամ էլ կարտոֆիլը ճզմել ու գոլորշին  շնչել:

Հում կարտոֆիլն օգնում է նաև այրվածքի ժամանակ: Եթե տաք կաթսայից կամ մեկ այլ տաք իրից այրվածք եք ստացել, պետք է վնասվածքի  հատվածը հում կարտոֆիլով տրորել կամ էլ քերած կարտոֆիլ դնել: Այս միջոցները կցավազրկեն այրվածքը` կանխելով ջրաբշտի ու սպիի առաջացումը: Ի դեպ,  հում կարտոֆիլով կարելի է թեթևացնել նաև արևայրուքը:  Աչքերի տակ առաջացած այտուցների  դեպքում նույնպես առաջարկվում է հում կարտոֆիլի (ցանկալի է սառը) շերտեր դնել աչքերին. ոչ միայն այտուցը կվերանա, այլև աչքերը կհանգստանան:

Կաղամբը նույնպես  օգտակար է աղեստամոքսային տրակտի ցավերի դեպքում: Դրա հյութը օգտակար է գաստրիտների, հաստ աղիքի բորբոքումների,  ստամոքսի և տասներկումատնյա  աղիքի  խոցային հիվանդությունների և աղիքային բորբոքումների ժամանակ: Կաղամբի թարմ հյութը շաքարի հետ թեթևացնում է հազը, իսկ ջրով բացած հյութը լավ միջոց է կոկորդի բորբոքումների դեպքում: Թթու դրած կաղամբի ջուրն օգնում է խումհարի ժամանակ: Ասում են, որ եթե խմելուց առաջ կաղամբ ես ուտում, ապա չես հարբում:

Գազարը մեծ քանակությամբ վիտամիններ  ու ակտիվ նյութեր է պարունակում, ինչի շնորհիվ օժտված է  ընդհանուր ամրապնդող հատկությամբ: Այն շատ օգտակար է փոքրերի համար: Գազարի մեջ պարունակվող A վիտամինը նպաստում է աճին: Տեսողության խանգարումների դեպքում նույնպես  խորհուրդ են տալիս գազար օգտագործել: Այն օգնում է հավկուրության դեմ պայքարին, գերազանց հակամանրէային և հակաբորբոքային ազդեցություն, արագ ապաքինելու ու հականեխիչ հատկություն ունի: Խաշած գազարն օգտակար է նեֆրիտի ու աղիքային դիսբակտերիոզի դեպքում: Օրգանիզմում գազարի լավ յուրացման համար հարկավոր է այն օգտագործել ձեթի  կամ թթվասերի հետ:

Վարունգը նույնպես լավ միջոց է  մարսողական համակարգի հիվանդությունների դեպքում, կարգավորում է մարսողությունը, արգելակում  նեխման պրոցեսները, իսկ  պարունակած բջջանյութը կանոնավորում է  աղիքների գալարակծկանքը: Մանրացված պտուղները հակաբորբոքային ու ցավազրկող ազդեցություն ունեն ստամոքսի  ու աղիքների ուժեղ ցավերի ժամանակ: Վարունգի հյութն օգնում է  հազի, փորկապության դեպքում, ավելացնում է միզարտադրությունը: Վարունգն օգտակար է նաև ցանի, բորբոքումների և ուռուցքների դեպքում` արտաքին օգտագործման համար: Վարունգի հյութը լայնորեն օգտագործվում է  կոսմետոլոգիայում. այն սպիտակեցնում է մաշկն ու թավշային որակ հաղորդում:

Սամիթն օգտակար է միզասեռական համակարգի խնդիրների դեպքում: Խորհուրդ է տրվում ցիստիտների, միզածորանի, երիկամային ցավերի դեպքում, քանի որ օժտված է  միզամուղ և լեղամուղ  հատկությամբ: Գլխացավի ու անքնության դեպքում ավելացնում է  կերակրող մայրերի կաթի քանակը:

Վարսակ. վարսակաշիլան ամենաօգտակար նախաճաշն է համարվում: Բարձրկալորիականության շնորհիվ այն հագեցնում է   և  երկար ժամանակ քաղցի զգացումը վանում:

Վարսակի եփուկները խորհուրդ են տրվում մարսողական համակարգի խնդիրների դեպքում. գաստրիտ,  ստամոքսի ու տասներկումատնյա աղիքի խոցային հիվանդություններ, կոլիտներ, պանկրեատիտ ու թունավորումներ: Այն օգտակար է բարձր ճնշման դեպքում, պաշտպանում է սրտանոթային համակարգը: Վարսակի մեջ պարունակվող ինոզիտոլն արգելակում է խոլեստերինային թերթիկների առաջացումը: Վարսակաշիլան հակասթրեսային հատկություն ունի,  ուստի դյուրաբորբոք ու նյարդային, քնի խանգարում ունեցող մարդկանց համար անփոխարինելի միջոց է:

Սոխը հրաշալի միջոց է մաշկային բորբոքումների դեպքում: Թարմ սոխի խյուսը օգտագործում են ցրտահարության, այրվածքների ու թարախապալարների ժամանակ:  Այն դադարեցնում է բորբոքումը, ցավազրկում  այն:

Բազուկը գերազանց  միզամուղ, հակաբորբոքային ազդեցությամբ օժտված բանջարեղեն է: Օգտակար է արյունատար համակարգի համար. ամրացնում է մազանոթների պատերը, նպաստում անոթների լայնացմանը, արյունաստեղծ հատկություն ունի (երկաթի պարունակության շնորհիվ), ինչը խանգարում է արյան բարձր ճնշմանն ու աթերոսկլերոզի զարգացմանը: Բազուկը նաև արյունը, երիկամները, լյարդը  մաքրող հատկություն ունի և  նպաստում է օրգանիզմից թույների դուրսբերմանը:

Մաղադանոս. օգտագործվում են տերևները, արմատներն ու սերմերը:  Եփուկն օգտագործվում է  որպես ախորժաբեր  և մարսողությանը նպաստող միջոց: Օգտակար է գաստրիտի, երիկամների ու գազառաջացման դեպքում: Մաշկի վնասվածքին կարելի է մաղադանոսի տերևներ դնել: Այն կցավազրկի ու կանցկացնի բորբոքային պրոցեսը: Կոսմետոլոգիայի մեջ մաղադանոսը կիրառում են որպես արդյունավետ միջոց պեպենների ու պիգմենտային բծերի դեմ:

Լոբին բոլոր լոբազգիների պես օգտակար է  մարսողության խնդիրների դեպքում, քանի որ համարվում է գերազանց դիետիկ մթերք: Կարևոր է առողջ ատամներ ունենալու համար, կարգավորում ու արգելում է ատամնաքարի առաջացումը: Այն հանգստացնող ներգործություն ունի և օգնում է անքնության դեմ պայքարում: Լոբին դրական ազդեցություն ունի միզասեռական ֆունկցիայի վրա, օգնում է լուծել երիկամային քարերը, բարերար է  պոտենցիայի  պահպանման ու վերականգնման համար:

Հարցեր, պատասխաններ, մեկնաբանություններ